ርዕሰ ሊቃነ ጳጳሳት በባርሴሎና፡ ክርስቲያኖች በተከፋፈለ ዓለም ውስጥ የአንድነት ገንቢዎች ይሁኑ አሉ!

የዚህ ዜና አቅራቢ መብራቱ ኃ/ጊዮርጊስ-ቫቲካን

የርዕሰ ሊቃነ ጳጳሳት ሊዮ አሥራ አራተኛ ወደ ስፔን የሚያደርጉት ጉብኝት ሁለተኛ ዙር የተጀመረው በባርሴሎና በሚገኘው የቅዱስ መስቀል ካቴድራል እና በቅድስት ኡላሊያ ቤተክርስቲያን እኩለ ቀን ጸሎት በማድረግ ነው።

ርዕሰ ሊቃነ ጳጳሳቱ በቀጥታ ከአውሮፕላን ማረፊያ ሲደርሱ፣ በደስታ በተሞላ ሕዝብ፣ ጳጳሳት፣ ቀሳውስት፣ የሀገረ ስብከት ባለሥልጣናት፣ ገዳማዊያን/ዊያት፣ የዘረዓ ክህነት ተማሪዎች፣ የካቴድራል ሠራተኞች፣ በጎ ፈቃደኞች እና በርካታ ወጣቶችን ጨምሮ ለቅዱስነታቸው አቀባበል አድርገውላቸዋል።

ርዕሰ ሊቃነ ጳጳሳት ሊዮ በመንበረ ታቦት ቅዱስ ቁርባን ፊት ለፊት ለተወሰነ ጊዜ በጸጥታ ጸሎት ያደረጉ ሲሆን ከዚያም መዘምራን የመክፈቻውን መዝሙር ከዘመሩ በኋላ ወደ ማዕከላዊው ቤተ መቅደስ መግባታቸው ተገልጿል።

በስፔናውያን እና ካታላን ቋንቋዎች አደባልቀው ባደረጉት ስብከት፣ ርዕሰ ሊቃነ ጳጳሳቱ ምእመናን በሁለት ምስሎች ላይ እንዲያሰላስሉ ጋብዛቸዋል፤ ሙሽራይቱ እና አካሏ በሆነው በክርስቶስ ላይ ማለት ነው።

ሙሽራይቱ

ቤተክርስቲያኗ፣ ርዕሰ ሊቃነ ጳጳሳት ሊዮ 14ኛ እንዳብራሩት፣ በመጀመሪያ ደረጃ “የተወደደች ሙሽራ” መሆኗን እና የባርሴሎና የካቶሊክ ማህበረሰብ - የተለያዩ ስጦታዎች፣ ውበቶች እና የግል ታሪኮች ያሉት - ለዚህ ምስክር ነው ሲሉ ተናግረዋል።

“እግዚአብሔር እዚህ እንድትሆኑ ፈቅዶላችኋል” ብለዋል ርዕሰ ሊቃነ ጳጳሳቱ፣ “ምክንያቱም በእናንተ እና አብራችሁ በመሆናችሁ ልዩ እና ቅዱስ ውበት እና መልካምነትን ይወዳል። ዛሬ በባርሴሎና ውስጥ ያለውን የቅዱሳን ህብረት እንድትወክሉ መርጧችኋል” ብለዋል።

ርዕሰ ሊቃነ ጳጳሳቱ ቤተክርስቲያን “ከእግዚአብሔር የሚቀድዳውን እና የሚመጣው የፍቅር ተግባር ፍሬ” እንደሆነች አፅንዖት ሰጥተው የተናገሩ ሲሆን ይህ ማለት ቤተክርስቲያን በትህትና እና በአመስጋኝነት ልብ እንድትወደድ በመፍቀድ ከሁሉም በላይ ታድጋለች፣ “ምክንያቱም በእግዚአብሔር የተወደዱ ብቻ ናቸው፣ ከሌሎች ጋር የፍቅር ስራዎችን መገንባት የሚችሉት” ብለዋል።

አካሉ

ርዕሰ ሊቃነ ጳጳሳት ሊዮ 14ኛ ከዚያም በሁለተኛው ምስል ላይ ለማሰላሰል አካል የተሰኘውን ጽንሰ ሐሳብ አብራርተዋል።

ርዕሰ ሊቃነ ጳጳሳቱ እንደተመለከቱት ሁላችንም ከክርስቶስ ጋር አንድ አካል ነን፣ ልክ እንደ አካል፣ “ጠንካራ የሆኑ የአካል ክፍሎች አሉ፣ ሌሎች ደግሞ ደካማ” ያሉ ሲሆን ከዚህም በላይ፣ አንዳንድ የቤተክርስቲያኒቱ አባላት “የሚታዩ፣ ለውጭው ዓለም ግልጽ የሆኑ ተግባራትን የሚያከናውኑ” ሲሆኑ፣ ሌሎች ደግሞ “ከውስጥ ሆነው ይሰራሉ ​​- በአንዳንድ ሁኔታዎችም ሳያቋርጡ እና ማንም ሳያስተውል አስፈላጊ ተግባራትን ያከናውናሉ” ብለዋል።

እንዲህ ባለው ልዩነት ፊት፣ ርዕሰ ሊቃነ ጳጳሳቱ ምእመናን ለአንድነት ቅድሚያ እንዲሰጡ አበረታተዋል፡- “ጠንካራዎች ነን ምክንያቱም አንድ ስለሆንን፣ እና አንድ ስለሆንን በአንድ መንፈስ ተንቀሳቅሰናል” ሲሉ አክለው ገልጸዋል።

በጦርነቶችና በክፍፍል በተበታተነ ዓለም፣ እና ከጊዜ ወደ ጊዜ እየተበታተነ እና ግለሰባዊ በሆነ ኅብረተሰብ ውስጥ፣ ርዕሰ ሊቃነ ጳጳሳቱ ክርስቲያኖች “ሰማዕታት” እንዲሆኑ አሳስበዋል - ማለትም “የአንድነት፣ የእንግዳ ተቀባይ፣ የስምምነትና የሰላም ምስክሮችና ነቢያት፣ መስዋዕትነትን ለመክፈል በመነሳሳት ጭምር” ሲሉ አስረድተዋል።