ርዕሠ ሊቃነ ጳጳሳት ሊዮ 14ኛ የፖላንድ ጠቅላይ ሚኒስትር ዶናልድ ተስክን በመንበራቸው ተቀበሉ

የዚህ ዝግጅት አቅራቢ ዮሐንስ መኰንን - ቫቲካን

ርዕሠ ሊቃነ ጳጳሳት ሊዮ 14ኛ ሐሙስ ሚያዝያ 29/2018 ዓ. ም. ረፋድ ላይ ከፖላንድ ሪፐብሊክ ጠቅላይ ሚኒስትር ዶናልድ ተስክ ጋር በቫቲካን ተገናኝተው ተወያይተዋል።

ጠቅላይ ሚኒስትር ተስክ በመቀጠልም ከቅድስት መንበር ዋና ጸሐፊ ብጹዕ ካርዲናል ፒየትሮ ፓሮሊን እና በቫቲካን የመንግሥታት እና ዓለም አቀፍ ድርጅቶች ግንኙነት ክፍል ዋና ጸሐፊ ሊቀ ጳጳስ ብጹዕ አቡነ ፖል ሪቻርድ ጋላገር ጋርም ተገናኝተዋል።

እንደ ቅድስት መንበር መግለጫ መሠረት፥ በቅድስት መንበር ጽሕፈት ቤት የተደረጉት ውይይቶች ገንቢ እንዲሁም በሁለቱ አገራት መካከል ያለውን መልካም ግንኙነት የሚያረጋግጡ እንደ ነበር ታውቋል።

መግለጫው አክሎም፥ “ውይይቶቹ በፖላንድ ማኅበራዊ እና ኢኮኖሚያዊ ሁኔታ እንዲሁም በፖላንድ በምትገኝ ካቶሊካዊት ቤተ ክርስቲያን እና በመንግሥት መካከል ባለው ግንኙነት፥ በተለይም በትምህርት መስክ እና በሥነ-ምግባር ጉዳዮች ላይ ትኩረት የሰጡ ነበር” ብሏል።

መግለጫው በመጨረሻም፥ በአሁኑ ዓለም አቀፍ ሁኔታ ላይ የሃሳብ ልውውጥ መደረጉን ገልጾ በተለይም በዩክሬን ስላለው ግጭት፣ እንዲሁም ፖላንድ በአውሮፓ ኅብረት ውስጥ ባላት ሚና ላይ ውይይት የተደረገበት እንደ ነበር አስታውቋል።

ርዕሠ ሊቃነ ጳጳሳት ሊዮ 14ኛ እና የፖላንድ ጠቅላይ ሚኒስትር ዶናልድ ተስክ   (@Vatican Media)