ር.ሊ.ጳ ሊዮ 14ኛ ሥነ-መለኮት የቤተክርስቲያኗን ተልእኮ ወደፊት ለማራመድ ያገለግላል አሉ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

“ሥነ-መለኮት የወንጌልን አዋጅ ያገለግላል፤ ስለዚህ የቤተክርስቲያኗ ተልዕኮ ዋና እና መሠረታዊ አካል ነው” ያሉት

ርዕሰ ሊቃነ ጳጳሳት ሊዮ 14ኛ ሰኞ ጠዋት የካቲት 23/2018 ዓ.ም በቫቲካን ከፑሊያ የሥነ-መለኮት የትምህርት ክፍል እና ከካላብሪያ የሥነ-መለኮት ኢንስቲትዩት ለተውጣጡ ለጣሊያን የሥነ-መለኮት ምሁራን ተወካዮችን ባነጋገሩበት ወቅት ይህንን ገልጸዋል።

በየተቋማቱ የሚሰጡትን የሕነጻ ትምህርቶች መንገድ በተመለከተ ርዕሰ ሊቃነ ጳጳሳቱ ወደፊት እና ወደኋላ እንዲሄዱ እና ሥነ-መለኮትን አብረው እንዲሰሩ አበረታቷቸዋል።

ፑሊያ እና ካላብሪያ በባህር ዳርቻ እንዳሉ በማስታወስ፣ የቀድሞ ርዕሰ ሊቃነ ጳጳሳት ፍራንችስኮስ እ.አ.አ በ2017 ዓ.ም የችቪልታ ካቶሊካ መጽሄት አዘጋጅ  ጸሐፊዎችን ባነጋገሩበት ወቅት “በክፍት ባህር ላይ ቆዩ። ካቶሊክ ክፍት ባህርን መፍራት የለበትም፤ አስተማማኝ ወደቦችን መጠጊያ መፈለግ የለበትም” ብለው መናገራቸውን አስታውሰዋል።

ርዕሰ ሊቃነ ጳጳሳት ሊዮ በተለይ ዛሬ እምነት መታወጅ እና መልማት ባለበት ሁኔታ ለዚህ አመለካከት ትልቅ ፍላጎት እንዳለ ተናግረዋል። “የአካዳሚክ ግዴታዎችን ለመወጣት ሀሳቦችን ማፍልቀ ብቻ ጠቃሚ አይደለም” ብለዋል፣ “ነገር ግን ደፋር በሆነ የባህር ጉዞ ላይ መጓዝ፣ በከፍታ ባሕሮች ላይ መሻገር” ያስፈልጋል ብለዋል።

ሁለት አቅጣጫ

ይህ ጉዞ፣ ርዕሰ ሊቃነ ጳጳሳቱ እንዳሉት፣ በሁለት አቅጣጫ ይንቀሳቀሳል ያሉ ሲሆን “በአንድ በኩል ወደ ጥልቁ የመውረድ፣ የእግዚአብሔርን ምስጢር እና የክርስትና እምነትን የተለያዩ ገጽታዎች የመፈተሽ መንገድ ነው፣  በሌላ በኩል፣ ከዚህ በላይ ለመሄድ፣ ሌሎች አድማሶችን ለማሰስ እና በዚህም ወንጌልን በተለያዩ የታሪክ ሁኔታዎች ውስጥ ለማወጅ አዳዲስ ቅርጾችን እና አዳዲስ ቋንቋዎችን ለማግኘት ወደ ጥልቅ ውስጥ መግባት ነው” ሲሉ ቅዱስነታቸው ተናግረዋል።

ርዕሰ ሊቃነ ጳጳሳቱ “አስፈላጊ ነጥብ” ማለትም “ሥነ መለኮት የወንጌልን አዋጅ ያገለግላል፤ ስለዚህ የቤተክርስቲያኒቱ ተልዕኮ ዋና እና መሠረታዊ አካል ነው” የሚለውን እንደገና ለማንሳት እንደሚፈልጉ ተናግረዋል።

የእምነትን ምስጢር ማጉላት

በዚህ አውድ፣ ሥነ-መለኮታዊ የሆነ የሕነጻ ትምህርት “ለጥቂት ባለሙያዎች ዕጣ ፈንታ” ሳይሆን “ለሁሉም የተላከ ጥሪ” መሆኑን አስታውሰዋል፣ ስለዚህም እያንዳንዱ የእምነትን ምስጢር እንዲያጠናክር እና የወንጌልን የባህል እና ማህበራዊ ግንኙነት ጽኑ ቁርጠኝነት በጉጉት እንዲቀጥል ጠቃሚ መሳሪያዎችን እንዲቀበሉ አሳስበዋል።

በዚህ አተያይ፣ ርዕሰ ሊቃነ ጳጳሳቱ በክልላቸው የተጀመረውን ውድ የአንድነት ጉዞ፣ እንዲሁም ቀደም ሲል በራስ ገዝነት የተከናወኑትን እውነታዎች፣ ተቋማት እና የሕነጻ ትምህርት መንገዶችን በማዋሃድ ማስታወስ እንደሚፈልጉ ተናግረዋል።

ርዕሰ ሊቃነ ጳጳሳት ሊዮ ይህ በእውነት "አስፈላጊ የሆነ ጥምረት" መሆኑን በመግለጻቸው ተደንቀዋል፣ ይህም "ዋና ገፀ-ባህሪያት እየሆኑበት ያለ እውነተኛ ታሪካዊ እርምጃ" መሆኑን ያሳያል፣ ይህም በሀገረ ስብከቶች መካከል ኅብረትን የሚያበረታታ፣ የድሮ የአካባቢ ፉክክርን ማሸነፍን የሚያበረታታ እና ከሁሉም በላይ ደግሞ በአንድነት እና በወንድማማችነት የተመሰለ የቤተክርስቲያን ጉዞን የሚያበረታታ ነው ብለዋል።

ወደኋላ ሳይሆን ወደ ወደፊት መጓዝ

በዚህ መንገድ ላይ፣ ርዕሰ ሊቃነ ጳጳሳቱ እንዳሉት፣ ስለ ሐዋርያዊ ተግዳሮቶች እና የወንጌላዊነት ፍላጎቶች የጋራ የአስተሳሰብ አድማስ እና የጋራ መግባባት መገንባት ይቻላል ብለዋል።

ስለዚህ፣ የሃይማኖት ሊቃውንትን “በአንድ ላይ ሥነ-መለኮትን እንዲያስፋፉ” ጋብዛቸዋል። የወንጌልን አዋጅ የሚያገለግል የሕነጻ ትምህርት የሚቻለው “በባዶ ባሕር ላይ” ብቻ ነው፣ እንደ ብቸኛ መርከበኞች ሳይሆን በአንድነት እንደሚጓዙ መርከበኞች መሆን  እንዳለበት አፅንዖት ሰጥተው ተናግረዋል።

ይህንን ጥረት፣ ርዕሰ ሊቃነ ጳጳሳቱ አበረታተዋል፣ “አንድን ሰው ደህንነቱ የተጠበቀ ወደብ ትቶ የራስን ግዛት እና የቤተክርስቲያን ወሰኖች አልፎ መሄድ፣ በመገናኘት እና በመለዋወጥ፣ በጋራ በመደማመጥ እና በውይይት፣ ሀብቶችን፣ ብቃቶችን እና ፀጋዎችን በሚያገናኝ አብያተ ክርስቲያናት መካከል ባለው ኅብረት”አብሮ መሄድን ይጠይቃል ብለዋል።

"ሥነ-መለኮትን አንድ ላይ በማድረግ" ቅዱስነታቸው አፅንዖት ሰጥተው እንደ ተናገሩት ከሆነ ምሁራዊ፣ መንፈሳዊ እና ሐዋርያዊ አድማሶች ይስፋፋሉ እና ይዋሃዳሉ፣ የጋራ አመለካከቶችን እና የበለጠ ሕያው የቤተክርስቲያን ቁርጠኝነትን ይፈጥራሉ፣ ይህም የእምነትን ስልቶች እና ቋንቋዎች እራሳቸውን በሚያገኙበት እውነተኛ አውድ ውስጥ የማደስ እድል ይሰጣል ብለዋል።

ሥነ-መለኮትን አንድ ላይ መከታተል

ከዚህም በላይ፣ ሥነ-መለኮትን አንድ ላይ በማድረግ፣ የወደፊት ቀሳውስትን እና ሐዋርያዊ አገልጋዮችን በሲኖዶሳዊነት ዘይቤ የቤተክርስቲያን ግንኙነቶችን እንዲኖሩ የሚያዘጋጅ ቤተ መከራ ወይም ላቦራቶሪ መሆኑን እንደሚገነዘቡ ተናግረዋል፣ በዚህ ውስጥ የተለያዩ የቤተክርስቲያን ርዕሰ ጉዳዮች፣ አገልግሎቶች እና ቸርነቶች እርስ በእርስ የሚደጋገፉበት፣ እያንዳንዱን የመዝጊያ ዓይነት የሚያሸንፉበት እና የማህበራዊ እና የባህል አውድ ጥያቄዎችን እና ተግዳሮቶችን በተሻለ ሁኔታ ለመቀበል የሚችሉበት ቤተ ሙከራ መሆናቸውን አረጋግጠዋል።

ርዕሰ ሊቀ ጳጳሱ የክልሉ የበለፀገ ታሪክ እና ሃይማኖታዊነት በሚያሳዝን ሁኔታ በርካታ ማህበራዊ ችግሮችን እንደማያጠፋ አምነዋል፣ የስራ ቀውስ፣ የስደት ክስተት እና እነዚያ ሁሉ የጭቆና፣ የባርነት እና የኢፍትሃዊነት ዓይነቶች አዲስ ህሊና እና በሁሉም በኩል ደፋር ቁርጠኝነት እንደሚያስፈልጋቸው አፅንዖት ሰጥተው ተናግረዋል።

ወደ ኋላ ለመመለስ በሚደረገው ፈተና አትታለሉ

በመጨረሻም፣ ቅዱስ አባታችን ሥነ-መለኮትየሕነጻ ትምህርት  ወሳኝ እና ትንቢታዊ አስተሳሰብን ለመፍጠር እንደሚረዳ አፅንዖት ሰጥተው የተናገሩ ሲሆን፣ ይህም ትዕግስት ማጣት እና የግዴለሽነት አመክንዮውን ለማዳከም የሚያስችል ለወደፊቱ የባህል ኢንቨስትመንት ነው ብለዋል።

“ይህንን ፕሮጀክት በጉጉት፣ በቁርጠኝነት እና ወደ ኋላ ለመመለስ በሚደረገው ፈተና ሳታታልሉ እንድትቀጥሉ አበረታታችኋለሁ” ብለዋል።

ርዕሰ ሊቃነ ጳጳሳት ሊዮ ከቀደሙት ሰዎች፣ ለተሾሙ አገልግሎት እጩዎች፣ የተቀደሱ ወንዶችና ሴቶች፣ ምዕመናን የሆኑ ወንዶችና ሴቶች አንድ ላይ የሚመሰረቱበት፣ የክርስቲያን ማህበረሰቦች የወንጌል ምልክቶች እና የተስፋ አውደ ጥናቶች እንዲሆኑ የሚያግዝ የትምህርት ማህበረሰብ እንዲያልሙ በመጋበዝ ንግግራቸውን ደምድመዋል።