ር.ሊ.ጳ ሊዮ 'ለአደጋ ተጋላጭ ለሆኑ ሰዎች እንክብካቤ ማድረግ የመለኮታዊ ፍቅር መገለጫ ነው' አሉ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

ርዕሰ ሊቃነ ጳጳሳት ሊዮ 14ኛ የምስረታ 50ኛ ዓመት ለማክበር ለፋዲካ (በካቶሊክ እንቅስቃሴዎች ላይ ፍላጎት ላላቸው በጎ አድርጊዎች እና ለጋሾች) - የካቶሊክ የበጎ አድራጎት ኔትወርክ መልእክት ልከዋል።

ርዕሰ ሊቃነ ጳጳሳቱ በዩናይትድ ስቴትስ እና በዓለም ዙሪያ የሚገኙ በርካታ የቫቲካን ጽሕፈት ቤቶች እና የካቶሊክ ተነሳሽነቶች ላደረጉት ልግስና ምስጋናቸውን ገልጸዋል።

ለፋዲካ ፕሬዝዳንት እና ዋና ሥራ አስፈፃሚ አሌክሲያ ኬሊ በላኩት መልእክት፣ ርዕሰ ሊቃነ ጳጳሳት ሊዮ ለዓመታዊ በዓሉ መሰብሰባቸው በጾም ወቅት መሆኑን አጉልተው ገልጸዋል፣ “ከጸሎት እና ከጾም በተጨማሪ ቤተክርስቲያኗ ሁሉም ካቶሊኮች የምሕረት ሥራዎችን በከፍተኛ ጉጉት እንዲተገብሩ የምትጋብዝበት ጊዜ” ነው ማለታቸው ተገልጿል።

ኢየሱስ ባልንጀሮቻችንን እንዴት መርዳት እንደምንችል እንድንገነዘብ ያስተማረንን ተግባር ሲያስታውሱ፣ ቅዱስ አባታችን ሁሉም ሰው የመልካሙን ሳምራዊ ምሳሌ እንዲከተል አሳስበዋል።

ርዕሰ ሊቃነ ጳጳሳት ፍራንችስኮስ ይህ ምሳሌ “የእግዚአብሔርን የቅርበት፣ የርኅራኄ እና ምሕረታዊ ፍቅር” እንዴት እንደገለጠ ብዙ ጊዜ በተግባር እንዴት እንደገለጹ አስታውሰዋል።

ርዕሰ ሊቃነ ጳጳሳት ሊዮ መክፈል የማይችሉ ችግረኞችን መርዳት የእግዚአብሔር መሳሪያዎች ስንሆን ነው፣ “ምክንያቱም ‘ለባልንጀራ የሚደረግ እያንዳንዱ የፍቅር ተግባር በሆነ መንገድ የመለኮታዊ ቸርነት ነጸብራቅ ነው’” ማለታቸውን አስታውሰዋል።

ይህንን በአእምሯቸው ይዘው፣ የፋዲካ “ማህበራዊ ፍትህን የሚያበረታቱ፣ የካቶሊክ ትምህርትን የሚያጠናክሩ፣ የሰውን ክብር የሚጠብቁ እና በጣም ተጋላጭ ለሆኑ ሰዎች እንክብካቤ የሚያደርጉ ፕሮግራሞችን ለመደገፍ የሚሠሩት ሥራ በእውነት የመለኮታዊ ቸርነት መገለጫ ነው” ሲሉ አሞግሰዋል።

ርዕሰ ሊቃነ ጳጳሳቱ ሥራቸው ሌሎች ሰዎች ኢየሱስን ለተቸገሩ ወንድሞቻቸው እና እህቶቻቸው በሚያደርጉት አገልግሎት እንዲያገኙ እንደሚያነሳሳቸው ተስፋቸውን ገልጸዋል።

ስለዚህ፣ ፋዲካ “ተልእኮውን” እንዲቀጥል አበረታተዋል፣ እግዚአብሔር “ለተቸገሩ ሰዎች በልግስና መስጠትን ይወዳል” ሲሉ አክለው ገልጸዋል።

መልእክቱን ሲያጠቃልሉ ቅዱስ አባታችን ድርጅቱን “የቅድስት ድንግል ማርያም የፍቅር አማላጅነት” እንዲሰጠው አደራ ሰጥተውታል፣ እናም ሐዋርያዊ ቡራኬያቸውን “በጌታ ውስጥ የሰላምና የደስታ ቃል ኪዳን” እንዲሰፍን ከተማጸኑ በኋላ መልእክታቸውን አጠናቀዋል።

ፋዲካ የካቶሊክ እንቅስቃሴዎችን እና ተነሳሽነቶችን የሚደግፉ የመሠረት እና የለጋሾች አውታረ መረብ ሲሆን በጋራ እሴቶቻቸው የተዋሃዱ ናቸው።