ር.ሊ.ጳ ሊዮ 'እምነትን በማስተላለፍ የሚገኘውን ደስታ መልሰን እንጎናጸፍ' ማለታቸው ተገለጸ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

ርዕሰ ሊቃነ ጳጳሳት ሊዮ 14ኛ ሐሙስ ዕለት ጥር 21/2018 ዓ.ም በቫቲካን በተካሄደው በቫቲካን የሃይማኖታዊ ጉዳዮችን የሚመለከተው የቅድስት መንበር ዋና ጽ/ቤት ባዘጋጀው ጉባኤ ላይ ባደረጉት ንግግር “እምነት ማስተላለፍ” “በዘመናችን በጣም አጣዳፊ ጉዳይ” እንደሆነ አጥብቀው ተናግረዋል።

ርዕሰ ሊቃነ ጳጳሳት ሊዮ በቫቲካን የሃይማኖታዊ ጉዳዮችን የሚመለከተው የቅድስት መንበር ዋና ጽ/ቤት አባላት ሰላምታ ሲያቀርቡ፣ “የሚያከናውኑትን ጠቃሚ አገልግሎት በሚገባ እንደሚያውቁ” ተናግረዋል። በላቲን ቋንቋ "praedicate Evangelium" (ወንጌልን ስበኩ) በተሰኘው ሐዋርያዊ ሕገጋት ላይ እንደተገለጸው ተልእኳቸው “ርዕሰ ሊቃነ ጳጳሳትን እና መላውን አቡናት ወንጌልን በዓለም ዙሪያ እንዲያውጁ መርዳት” መሆኑን አስታውሰው፣ “የካቶሊክ እምነትን እና ሥነ ምግባርን በተመለከተ የካቶሊክን አስተምህሮ ታማኝነት በማስተዋወቅ እና በመጠበቅ” የመርዳት ተልእኮ መሆኑን አስታውሰዋል። በቫቲካን የሃይማኖታዊ ጉዳዮችን የሚመለከተው የቅድስት መንበር ዋና ጽ/ቤት ይህንን የሚያደርገው “በእምነት ላይ የተመሠረተ አስተምህሮን በመጠቀም እና አዳዲስ ጥያቄዎች ሲነሱ ጥልቅ ግንዛቤን ለመፈጠር” ነው ብለዋል።

‘የጽ/ቤቱ ተግባር’

ርዕሰ ሊቃነ ጳጳሳቱ በቫቲካን የሃይማኖታዊ ጉዳዮችን የሚመለከተው የቅድስት መንበር ዋና ጽ/ቤት ባለሥልጣናት ባደረጉት ንግግር “የእናንተ ተግባር ብዙውን ጊዜ በጣም ስስ በሆኑ ጥያቄዎች ላይ ሐዋርያዊ እና ሥነ-መለኮታዊ መመሪያን በመጠቀም ስለ ቤተክርስቲያን አስተምህሮ ማብራሪያ መስጠት ነው” ብለዋል።

በቫቲካን የሃይማኖታዊ ጉዳዮችን የሚመለከተው የቅድስት መንበር ዋና ጽ/ቤት በቅርብ ዓመታት ውስጥ ላሳተሙት ሰነዶች ምስጋናቸውን ሲገልጹ፣ ርዕሰ ሊቃነ ጳጳሳት ሊዮ “እንዲህ ዓይነቱ ሰፊ ሥራ ለቅዱሳን እና አማኝ ለሆኑ የእግዚአብሔር ሕዝቦች መንፈሳዊ እድገት ትልቅ ጥቅም እንደሚኖረው በእርግጠኝነት አምነዋል” ብለዋል።

“በምንኖርበት የዘመናት ለውጥ ሁኔታ” ርዕሰ ሊቃነ ጳጳሳት ሊዮ 14ኛ እንደ ተናገሩት ከሆነ ይህ ሥራ “ለምዕመናን ከቤተክርስቲያን ወቅታዊ እና ግልጽ የሆነ ቃል ይሰጣል” በተለይም “በታሪክ መድረክ ላይ ስለሚታዩት ብዙ አዳዲስ ክስተቶች” እና “ለጳጳሳት የእረኝነት ተግባራቸውን በሚገባ እንድያከናውኑ እንዲሁም ለሥነ መለኮት ምሁራን በጥናት እና በወንጌል አገልግሎት ዘርፍ ጠቃሚ መመሪያ ይሰጣል” ብለዋል።

ርዕሰ ሊቃነ ጳጳሳቱ የምልአተ ጉባኤው ስብሰባ “በዘመናችን በጣም አጣዳፊ ጉዳይ የሆነውን የእምነት ስርጭት” በሚል ጭብጥ ላይ ፍሬያማ ውይይት በመጀመሩ ልዩ አድናቆታቸውን ገልጸዋል።

የወንጌል አገልግሎት ደስታን እንደገና ያግኙ

“በእርግጥም በቅርብ አሥርተ ዓመታት ውስጥ በካቶሊክ እመነት ተከታዮች መካከል የክርስትና እምነትን በትውልድ ውስጥ በማስተላለፍ ረገድ መቆራረጥ መከሰቱን መካድ አንችልም፣ እናም በተለይም በጥንታዊ የወንጌል አገልግሎት አውዶች፣ ወንጌልን ለራሳቸው ህልውና እንደ መሠረታዊ ምንጭ አድርገው የማያዩ ሰዎች ቁጥር እየጨመረ መምጣቱን ችላ ማለት አንችልም፣ በተለይም በወጣት ትውልድ መካከል” ሲሉ ርዕሰ ሊቃነ ጳጳሳት ሊዮ ተናግረዋል።

በተጨማሪም ብዙ ወጣት ወንዶችና ሴቶች ስለ እግዚአብሔር ወይም ስለ ቤተክርስቲያን ምንም ማጣቀሻ ሳይኖራቸው እንዴት እንደሚኖሩ ሳስብ ያሳዝነኛል፣ “ይህ ለእኛ ለአማኞች ታላቅ ሀዘን ቢያመጣብንም፣” “የወንጌል አገልግሎት ጣፋጭና አጽናኝ ደስታን” እንደገና እንድናገኝ ሊያደርገን ይገባል፣ ይህም የክርስቶስ ሙሽራ ሕይወትና ተልዕኮ ዋና ማዕከል ነው” ብለዋል።

ርዕሰ ሊቃነ ጳጳሳት ሊዮ “ከሁሉም በላይ ወንጌልን በመሳብ ኃይል የምታውጅ ቤተክርስቲያን አስፈላጊ መሆኑን በድጋሚ ተናግረዋል፣ ይህም የቀድሞ ርዕሰ ሊቃነ ጳጳሳት ቤኔዲክቶስ 16ኛ እና የቀድሞ ርዕሰ ሊቃነ ጳጳሳት ፍራንችስኮስ ደጋግመው አፅንዖት ሰጥተው የተናገሩት" ጉዳይ እንደ ነበረ ቅዱስነታቸው አክለው ገልጸዋል።

የክርስቶስ አካል የሕይወት መሠረት “ወልድ ሥጋ ለብሶ በተገለጠልን፣ በመንፈስ ስጦታ በእኛ ውስጥ የሚኖረውና የሚሠራው የአብ ፍቅር ነው” ሲሉ ርዕሰ ሊቃነ ጳጳሳት ሊዮ የተናገሩ ሲሆን በዚህ መሠረት “የምትስባችው ቤተክርስቲያን ሳትሆን ክርስቶስን ነው” ሲሉ አስረድተዋል፤ “ክርስቲያን ወይም የቤተ ክርስቲያን ማህበረሰብ የሚስበን ከሆነ፣ በዚያ ‘መስመር’ በኩል ከአዳኝ ልብ የሚወጣውን ጠቃሚ የበጎ አድራጎት ፍሰት ነው” ብለዋል። ስለዚህ፣ “ቤተ ክርስቲያን ክርስቶስን ታውጃለች፣ ያለ ልዩነት በእሷ ውስጥ እያንዳንዱ ሰው ራሱን ወይም እራሷን “በጌታ የወይን እርሻ ውስጥ ቀላል እና ትሑት ሠራተኛ” ብቻ እንደሆኑ ሁልጊዜም ማወቅ አለባቸው" ብለዋል።

በመጨረሻም፣ ርዕሰ ሊቃነ ጳጳሳት ሊዮ 14ኛ ከእርሳቸው በፊት የነበሩት ሁሉ በቫቲካን የሃይማኖታዊ ጉዳዮችን የሚመለከተው የቅድስት መንበር ዋና ጽ/ቤት እና ለመላው ቤተክርስቲያን ሕይወት እና ሥራ ላበረከቱት ጠቃሚ አስተዋጽኦ ምስጋናቸውን በድጋሚ አቅርበው “በተለይም እንዲህ ዓይነቱ አስተዋጽኦ በትህትና እና በቆራጥነት ሲቀርብ እጅግ በጣም ያስደስታል" ካሉ በኋላ ሐዋርያዊ ቡራኬያቸውን ሰጥተው ንግግራቸውን አጠናቀዋል።