ር.ሊ.ጳ ሊዮ ለካቶሊክ ሚዲያዎች 'የእርቅ ድምጾችን አጉሉ፣ ልብን ቂም አስፈቱ' ማለታቸው ተገለጸ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

“የመልካም ቃላት ዘሪዎች፣ የጥላቻንና የአክራሪነትን ልብ በማላላት በድፍረት እርቅን የሚፈልጉ የድምፅ ማጉያዎች እንድትሆኑ አበረታታችኋለሁ” ሲሉ ረቡዕ ጥር 13/2018 ዓ.ም በቫቲካን ዋና ጸኃፊ ካርዲናል ፒዬትሮ ፓሮሊን ፊርማ እና ለፈረንሳይ ካቶሊክ ሚዲያ ፌዴሬሽን (ፌዴሬሽን ዴስ ሜዲያስ ካቶሊኮች) በተላከ መልእክት ውስጥ የተገለጸ ጭብጥ ነው።

“በተበታተነ እና በዋልታ ረገጥ አስተሳሰቦች በሚናጠው ዓለም፣ ደካማ፣ የተገለሉ፣ ብቸኛ የሆኑ ሰዎች፣ የተወደዱ የመሆንን ደስታ ማወቅ የሚያስፈልጋቸውን የሚቀበሉ እና የሚያስተላልፉ አንቴናዎች ሁኑ” ብለዋል ርዕሰ ሊቃነ ጳጳሳቱ።

መልእክቱ የተላከው ከጥር 13 እስከ ጥር 15/2018 ዓ.ም በፈረንሳይ በሉርድ በሚካሄደው የቅዱስ ፍራንችስኮስ ደ ሳላስ 29ኛው እትም መጽኤት በኩል ይፋ መሆኑ ተገልጿል። በየዓመቱ የፌዴሬሽን "ዴስ ሜዲያስ" ካቶሊኮች ይህንን ዝግጅት ያዘጋጃሉ፣ ይህም ከመላው ዓለም የተውጣጡ ጋዜጠኞችን የካቶሊክ ሚዲያ እና የመገናኛ ተልእኮን እንዲያስቡ ይጋብዛል።

"በመገናኛ መስክም ጭምር - በአርቴፊሻል ኢንተለጀንስ ቴክኖሎጂ ብቅ ማለት የተመሰለውን ይህንን ዘመን ለመጋፈጥ፣ ወደ ልብ ምክንያቶች፣ ወደ ጥሩ ግንኙነቶች ማዕከላዊነት እና ማንንም ሳያገልሉ ወደ ሌሎች የመቅረብ ችሎታ መመለስ አስቸኳይ ጉዳይ ነው" ሲሉ ርዕሰ ሊቃነ ጳጳሳት ሊዮ በመልእክታቸው አፅንዖት ሰጥተው ገልጸዋል።

ይህ ፍላጎት "የካቶሊክ ሚዲያዎች ለሁሉም ሰው፣ ኢ-ማኒያን ጭምር ሊያቀርቡት የሚችሉትን የእውነት አገልግሎት" ምላሽ ማግኘት እንደሚቻል አስረድተዋል።

የሚከተለው ምሳሌ፡ አባ ዣክ ሃሜል

ርዕሰ ሊቃነ ጳጳሳት ሊዮ እ.አ.አ በ2016 ዓ.ም የእስልምና መንግሥት ተብሎ በተጠራው አሸባሪዎች የተገደሉትን የፈረንሳይ ቄስ አባ ዣክ ሃሜልን ለካቶሊክ ኮሙዩኒኬሽኖች መነሳሻ ምንጭ አድርገው ጠቁመዋል። ርዕሰ ሊቃነ ጳጳሳቱ እንዳመለከቱት የፌዴሬሽን "ዴስ ሜዲያስ" ካቶሊኮች በየዓመቱ በስራቸው ሰላምን እና በሃይማኖት መካከል የሚደረግ ውይይትን ላበረታቱ ጋዜጠኞች የሚያቀርቡት በቄሱ ስም የተሰየመ ሽልማት አላቸው።

አባ ሃሜል ሕይወታቸውን እስከመስጠት ድረስ ለእምነት ምስክር እንደነበሩ እና ሁልጊዜም በውይይት ዋጋ እንደሚያምኑ አፅንዖት ሰጥተው ቅዱስነታቸው በመልእክታቸው ገልጸዋል።

“አባ ሃሜል ከሌሎች ጋር ያለ ምንም ልዩነት እንዴት ቅርብ መሆን እንደሚቻል ማወቅ አጣዳፊ እንደሆነ እርግጠኛ ነበሩ” ሲሉ ርዕሰ ሊቃነ ጳጳሳት ሊዮ በመልእክታቸው የገለጹ ሲሆን “እርስ በርስ ለመተዋወቅ፣ በልዩነቶቻችን ሳንፈራ፣ ማንነታችንን እና የምናምነውን ለመፈተን ዝግጁ ሆነን መገናኘት አለብን” ብለዋል።

“የእርሳቸው ምሳሌ ሁሉንም ነገር በሚያብራራ ፍቅር እውነትን ፈላጊዎች፣ የሚያቅፍ ቃል ከአፋቸው የሚወጣ ጥበበኛ፣ የተሰበረውን አንድ ላይ የሚያመጣ ግንኙነት፣ ለሰው ልጅ ቁስል የሚሆን መድኃኒት እንድትሆኑ ያበረታታችኋል” ካሉ በኋላ ቅዱስነታቸው መልእክታቸውን አጠናቀዋል።